Comisión pola Recuperación da Memoria Histórica da Coruña

O amor a Fraga non ten límites


O alcalde de Lugo, o dirixente do PSOE José López Orozco, volveu deixar moi clara esta mañá a súa postura con respecto á posibilidade de que unha rúa da cidade leve o nome de Manuel Fraga, e en contra da opinión dos seus socios de Goberno do BNG, afirmou que é "merecedor" de tal recoñecemento.

En rolda de prensa, o rexedor local recoñeceu que esa proposta non vai provocar "ningún enfrontamento" entre os socios do bipartito e afirmou que o Goberno local non perderá "nin un só minuto" en disputas estériles, porque por parte duns e doutros hai "distintas visións da realidade".

A pesar de que os nacionalistas invocan o cumprimento da Lei de Memoria Histórica como un dos argumentos para oporse a esa iniciativa, o alcalde lembrou que "as leis hai que cumprilas, pero tamén hai que interpretalas", porque "se non fose necesario interpretalas, non farían falta avogados nin xuíces e sería suficiente cun computador".

"Eu vivín o franquismo. Recordo perfectamente cando condenaron á morte ao señor -Julián- Grimau e sei que ministros estaban alí. Pero, sabe o que me di a miña memoria, que o señor Fraga asinou a Constitución no ano 1978. Posibilitou esa constitución e esa constitución fixo que levemos trinta e cinco anos de convivencia e de entendemento", afirmou López Orozco.

Grazas a eses cambios, precisou, "comprendemos o noso pasado" e hoxe "podemos reivindicar ao señor Grimau".  "Creo que o señor Fraga, presidente da Xunta de Galicia, é merecedor dunha rúa na nosa cidade", concluíu López Orozco, aínda que tamén recoñeceu que esa proposta "non vai ser aprobada por unanimidade".