Comisión pola Recuperación da Memoria Histórica da Coruña

O Bloque oponse a que o expresidente  Fraga teña unha rúa en Lugo

Apela á lei de memoria histórica para rexeitar que Fraga dea nome a unha vía lucense

O tenente de alcalde de Lugo, Antón Bao (BNG), anunciou onte que o seu grupo se oporá a que a corporación municipal designe unha rúa co nome do expresidente da Xunta, Manuel Fraga, e argumenta a súa postura na proposta do PP sobre a lei da memoria histórica.

O dirixente nacionalista advertiu de que non se pode "eludir" o "pasado das persoas" e, aínda que non quixo profundar nos seus argumentos en contra, si insistiu en que a historia das persoas leva aparellada todo o que foron. Neste sentido, lembrou que, nun momento determinado, Fraga "formou parte dun réxime que está aí", o cal os nacionalistas "critican duramente".

O tenente de alcalde fixo estas declaracións durante un acto no que participaba tamén o alcalde, o socialista Xosé López Orozco, que advertía de que a proposta parte do PP e que pasará á "comisión correspondente", do rueiro neste caso.