Comisión pola Recuperación da Memoria Histórica da Coruña

A insignia colga do altar maior do cemiterio de Paracuellos

O bispo de Alcalá de Henares permite que a bandeira franquista volva estar presente nunha misa

O pasado mes de decembro, a imaxe do bispo de Alcalá de Henares, monseñor Juan Antonio Reig Plà, oficiando unha misa no cemiterio de Paracuellos do Xarama (Madrid) á beira dunha bandeira franquista e rodeado de membros da extrema dereita tan significativos como Blas Piñar acabou circulando pola inmensa maioría dos xornais españois. Tras a denuncia do Plural, o PSOE non dubidou en cualificar os feitos de "inaceptables" porque lembraban "aos escuros e terribles anos do franquismo".



O bispo de Alcalá de Henares oficia misa xunto á bandeira franquista.


Aínda que o bispo gardou un escandaloso silencio e non explicou por que homenaxeou en Paracuellos aos que "deron testemuño da súa fe gritando Viva España e Viva Cristo Rei ao morrer", Gabriel Alfajeme, secretario de Juan Antonio Reig Plà, escusou a actitude do seu superior: "Reig Plà nin se decatou, nin se deu conta da presenza da bandeira. Se alguén meteu a pata, ese fun eu (...) Se alguén me dixo algo sobre a conveniencia da bandeira non me dei conta. Seguro que foi culpa das présas na preparación da cerimonia. Ademais o bispo respondeu a unha invitación e cando un vai a casa allea non se pon a dicir `quítame isto de aquí, quítame isto de alá´".

Reincidente

Con todo, este mes de xullo, o bispo de Alcalá de Henares volveu a tolerar que a bandeira franquista presida unha misa no cemiterio de Paracuellos do Xarama. A cerimonia foi oficiada polo pai Felipe de Lope, ex Párroco de Loeches, e un sacerdote salesiano misioneiro en Santo Domingo. Na páxina web do partido de extrema dereita Acción Xuvenil Española pode comprobarse que a bandeira preconstitucional estaba situada no altar maior, xusto á dereita dos sacerdotes.