Comisión pola Recuperación da Memoria Histórica da Coruña

Un xuíz avala a retirada do título de alcalde honorífico de Madrid a Franco

A resolución apoia un acordo municipal baseado na Lei de Memoria

Un ano despois de que o Pleno do Concello de Madrid votase por unanimidade desposuír a Francisco Franco do seu título de alcalde honorífico da cidade, fillo adoptivo e das súas medallas de ouro e honra, un xuíz desestimou o recurso que, ante o acordo municipal, interpuxo a Fundación Francisco Franco.

O 29 de xuño de 2009 o grupo municipal de Esquerda Unida levou ao Pleno unha proposta para retirar ao Caudillo todas as honras e distincións que o mesmo Concello de Madrid outorgoulle entre 1942 e 1964. A iniciativa estaba apoiada polo artigo 15 da lei da Memoria Histórica que obriga ás administracións públicas a retirar todos os símbolos franquistas. O acordo contou co apoio de todos os grupos políticos (PP, EU e PSOE). Cincuenta e dous votos a favor dos 57 presentes. Cinco edís abstivéronse.

O acordo municipal non sentou nada ben na Fundación Nacional Francisco Franco que, segundo recolle a sentenza á que tivo acceso este xornal, contempla como parte das súas metas "dar a coñecer a obra levada a cabo nos anos de mandato de Francisco Franco, que no que incumbe a Madrid motivaron as honras que no seu día lle dispensou o Concello, así como o enaltecemento da súa figura e obra e a defensa do seu legado". O seu presidente, Félix Morais Pérez, acudiu seis meses despois aos xulgados do contencioso-administrativo para defender a honra de quen dá nome á súa fundación.

Os argumentos esgrimidos pola fundación para que se manteñan as medallas ao ditador son bastante claros: as honras e distincións concedidos a Franco non teñen relación co alzamento do 18 de xullo de 1936, "senón que se lle outorgan como recoñecemento aos seus desvelos e interese por engrandecer a cidade de Madrid".O escrito presentado pola Fundación Nacional Francisco Franco enaltece a figura do ditador, na súa opinión "meritoria" de todo recoñecemento: "As honras concédenselle polas inxentes obras públicas e servizos de que foi dotada a cidade e non pola súa vitoria na fronte popular". Varias liñas máis abaixo, tras lembrar os supostos "desvelos" de Franco pola cidade, a fundación considera que "no último cuarto de século o mellor alcalde de Madrid foi o propio xefe do Estado".

Ademais, a fundación rexeita que o artigo 15 da Lei da Memoria Histórica contemple a retirada destas honras e mencións porque, di, non estiveron relacionados con "unha exaltación da sublevación militar ou da Guerra Civil".

O xuíz, con todo, discrepa. "Este artigo inclúe non só a retirada de obxectos, senón tamén aquelas mencións, conmemoracións ou distincións que supoñan un recoñecemento á Guerra Civil, á ditadura, ao franquismo e, por iso, tamén á figura de Francisco Franco Bahamonde e a canto supoña un enaltecemento da súa figura". E por isto, falla en contra de anular a decisión tomada no pleno municipal, aínda que non condena á fundación ao pago das costas.

Félix Morais, o presidente da fundación, asegurou a este xornal que non sabe aínda se recorrerá a sentenza. Ten até o próximo día 26 para pensarllo. "Tería que falar co resto de membros da fundación, así que non lle podo contestar", dixo por teléfono.

En Madrid, a Fundación Francisco Franco tamén recorreu a retirada da estatua de Novos Ministerios. Catro anos despois, o Tribunal Superior de Xustiza de Madrid declarou nula a retirada da efixie porque detectara infraccións administrativas por parte do Ministerio de Fomento, aínda que tamén estableceu que non era necesario repola porque non tiña utilidade práctica, informa Natalia Junquera.