Comisión pola Recuperación da Memoria Histórica da Coruña

Santiago catalogará a simboloxía franquista para retirala

O Pleno do Concello de Santiago aprobou este xoves, cos votos de PSOE e BNG, realizar un censo da simboloxía franquista existente na cidade para a súa posterior retirada e levar a cabo actuacións de ‘recuperación e dignificación’ dos veciños que sufriron a represión, aos que se lles dedicará o nome de novas rúas.

Esta proposición, defendida polo BNG, e que contou co apoio do Grupo Municipal Socialista e o voto en contra do Grupo Municipal Popular, ten tamén por obxectivo instar á Xunta a "restabelecer a colaboración existente" na lexislatura anterior coas asociacións de recuperación da memoria histórica.

Igualmente, persegue reclamarlle ao Goberno autonómico que concrete o protocolo de actuación asinado polo anterior Executivo co Instituto de Medicina Legal de Galicia e co da Universidade de Santiago; e esixirlle que colabore coa Administración central para a elaboración do mapa de foxas necesarias para localizar o paradoiro dos represaliados durante a Guerra Civil e a ditadura.

A proposición defendida polos nacionalistas galegos pretende facer cumprir a Lei de Memoria Histórica, que ten por obxectivo recoñecer e ampliar dereitos e estabelecer medidas en favor dos que padeceron persecución ou violencia durante a Guerra Civil e a posterior ditadura.