Comisión pola Recuperación da Memoria Histórica da Coruña

Fascismo no século XXI

Blas Piñar pide ao Rei en Intereconomía que se rebele e non sancione a lei do aborto

Intereconomía TV volveu a servir unha vez máis para dar voz aos nostálxicos do franquismo: o programa España na memoria que presenta Alfonso Arteseros contou co líder de Fuerza Nueva, Blas Piñar, como convidado de excepción para facer un repaso pola transición española. O líder dereitista non dubidou en criticar o devandito período, así como o texto constitucional. Ademais, aproveitou a súa visita á televisión de Ariza para arremeter contra a lei do aborto e advertirlle ao Rei de que, cando chegue o momento de sancionar a nova norma, tal e como marca a Constitución, "hai que obedecer a Deus antes que ao home, e a Constitución é unha obra dos homes"

Non é a primeira vez que Intereconomía TV recibe nos seus estudios a todo tipo de nostálxicos do franquismo: este domingo tocoulle a quenda ao que fose líder de Fuerza Nueva, o ultradereitista Blas Piñar, que deu a súa particular visión da Transición e da actualidade. Piñar non sentiu ningún rubor ao criticar o paso do franquismo á democracia e, con iso, á figura do Rei, algo que tampouco é novo no grupo de Julio Ariza.

O Rei e a Transición

"Cando o Rei xurou como Príncipe, dixo que a monarquía á que ía acceder era a monarquía do movemento nacional. Logo, na mensaxe da coroa, volveu lembrar a figura de Franco e que o seu comportamento e lealdade sería ao que iso representaba. Pero cando se fixo a Transición, o engano foi tan tremendo que se empregaron para conseguila non palabras ameazadoras, senón palabras moi suxestivas como reconciliación e reforma. Pero a reconciliación escondía o desquite, e a reforma, a ruptura, e é o que estamos agora vivindo a través da Memoria Histórica, a Educación para a Cidadanía, que tratan de cambiar moralmente aos españois e conseguírono", lamentou o dirixente.

"Obedecer a Deus antes que ao home"

Pero as súas críticas á actitude do Rei e ás políticas do Executivo de José Luís Rodríguez Zapatero foron máis lonxe ao introducirse o tema da nova lei do aborto. Intereconomía xa suxeriu con anterioridade que o Rei non debe sancionar esta norma, e o mesmo opinou Piñar: "Hai un canon no Dereito Canónico que di que o que procura o aborto queda excomulgado (...), pero está o problema da ambigüidade do termo procurar. Amparados nesa ambigüidade, podemos dicir que o Rei é responsable do aborto, por pór a súa firma á beira da lei do aborto". "Hai que ter en conta que hai un precepto superior: que hai que obedecer a Deus antes que ao home, e a Constitución é unha obra de homes", advertiu ao monarca.

"Non cría que chegariamos a estes límites"

Ademais, para Piñar, a situación de España co Executivo socialista é insustentable: "Non cría que chegariamos a estes límites, [Zapatero] está a conseguir descristianizar ao pobo español, pór en grave perigo a unidade histórica de España e cambiar ideal e moralmente aos españois, sobre tres alicerces: o perjurio a todos os niveis, a mentira e a corrupción xeneralizada en toda España", alertou despois de insistir en que "a unidade de España está a correr un gravísimo perigo".

Amosa a túa opinión sobre este artigo

Nome:
O teu correio:
Encabezamento:
Comment:
Código Antispam:
	Opinar Previsualizar

yvComment v.1.16.1