Comisión pola Recuperación da Memoria Histórica da Coruña

O Executivo di que estudará as peticións do xuíz arxentino que investiga os crimes do franquismo.

Caamaño lembra que España leva décadas «reparando» aos agraviados pola Guerra Civil.


O Goberno eludiu onte valorar se existe xurisprudencia ou non para que xuíces arxentinos investiguen os crimes cometidos en España durante a Guerra Civil e nos anos do franquismo. O ministro de Xustiza, Francisco Caamaño, na rolda de prensa posterior ao Consello de Ministros, limitouse a confirmar que o Executivo español «respecta» as decisións da Xustiza arxentina e que «estudará» calquera petición de cooperación xurídica que realice María Servini de Cubría, a maxistrada arxentina encargada do caso, a pesar de que o Goberno español «non é parte» neste sumario. A Sala II da Cámara Federal arxentina instou a Servini a enviar un exhorto a Madrid para confirmar se nos tribunais españois «está a investigarse a existencia dun plan sistemático xeneralizado e deliberado para aterrorizar aos españois partidarios da forma representativa de goberno a través da súa eliminación física levado a cabo entre o 17 de xullo de 1936 e o 15 de xuño de 1977».

Caamaño, máis aló desta cortesía procesual, salientou o labor levado a cabo por varios Gobernos democráticos españois á hora de «reparar» «gran parte das consecuencias» da Guerra Civil e a ditadura. Como exemplo desta traxectoria citou a Lei de Memoria Histórica, que declarou ademais ilexítimos os procesos xudiciais do franquismo.

«Ou ben por acción do Goberno, ou do Parlamento ou dos tribunais, habemos ir pondo remedio a esa situación. Queda tarefa por facer, pero creo que a sociedade e a democracia española ha feito moito», remachou.

O titular de Xustiza enumerou, como principais logros neste sentido por parte dos Gobernos españois, que se recoñeceron indemnizacións, outorgado pensións e rehabilitado funcionarios.