Comisión pola Recuperación da Memoria Histórica da Coruña

O PP de Alacante 'salva' a Franco

A Deputación rexeita retirar os títulos honoríficos ao xeneral

Santiago Navarro para "El País".- Alacante 04/07/2008

O PP de Alacante, que preside José Joaquín Ripoll, considera que as distincións honoríficas concedidas ao ditador Franco e á súa familia non son un asunto de actualidade nin xeran unha especial preocupación no seo da sociedade. Así, o Grupo Popular da Deputación de Alacante, que preside Ripoll, fixo valer onte a súa maioría absoluta e rexeitou unha moción do Grupo Socialista para retirar os títulos honoríficos concedidos a Franco. Os socialistas pedían que se quitase o nomeamento de fillo adoptivo e predilecto ao ditador e o de Almendro en flor, á súa muller, Carmen Polo. A proposta do PSPV enmárcase no cumprimento da Lei da Memoria Histórica.

"O nomeamento de fillo predilecto de Franco non lle quita o soño a ninguén, sobre todo a aqueles que creceron en democracia", dixo a deputada popular Mercés Alonso. Esta esgrimiu outro argumento, neste caso xurídico, para reforzar a postura do PP. Segundo a deputada, o artigo 2 do regulamento da Deputación establece que todos os nomeamentos honoríficos son vitalicios e, xa que logo, "non se pode quitar ningunha distinción a Franco". A exposición de Alonso foi reforzada por Ripoll: "Nin eu nin ninguén do meu partido somos debedores do franquismo", dixo.

A negativa dos conservadores alacantinos a adoptar resolucións encamiñadas á eliminación dos símbolos franquistas foi cualificada de "hipócrita e demagoga" polo portavoz adxunto do Grupo Socialista, Roque Moreno: "A postura do PP nesta materia dá moito que entender porque se rexeitan que se retiren todas estas distincións a un ditador é que porque non condenan o franquismo", sinalou.

Moreno sacou a colación o contraditorio voto da deputada popular Luisa Pastor, á súa vez, alcaldesa de Sant Vicent do Raspeig: "No seu pobo votou [Pastor] a favor da retirada de todas as condecoracións e distincións ao ditador Franco e, en cambio, agora, no pleno provincial vota en contra".

San Vicent do Raspeig, gobernado polo PP, foi a última localidade de Alacante onde se acordou, o pasado 28 de maio, a retirada dos símbolos franquistas. Antes, o Concello de Sant Joan d'Alcant, neste caso gobernado polo PSPV, adoptou a mesma resolución. A iniciativa contou co respaldo do PP. Elxe aprobou a moción, co voto a favor do PSPV, e a abstención do PP. A retirada da simboloxía franquista foi, en cambio, rexeitada polos gobernos populares de Alacante e Castelló.

Amosa a túa opinión sobre este artigo

Nome:
O teu correio:
Encabezamento:
Comment:
Código Antispam:
	Opinar Previsualizar

yvComment v.1.16.1