17 Mar 2010 |
Comeza o traslado da estatua de Franco de Ferrol
|
| Comeza o traslado da estatua de Franco de Ferrol Onte deron comezo os traballos de traslado da estatua ecuestre de Franco do Arsenal militar de Ferrol, dous meses despois de que o Concello, propietario da figura, comunicase o acordo alcanzado co Ministerio de Defensa, que ordenou levar a figura a un almacén militar e cubrila cunha tea, en cumprimento coa lei de Memoria Histórica. Cinco traballadores do Arsenal militar de Ferrol comezaron a repicar o pedestal sobre o que se coloca a efixie, retirando as suxeicións que ancoran a peza, aínda que aseguraron que a operación non quedaría rematada onte.
A estatua ecuestre do ditador –elaborada en bronce, de sete toneladas de peso e seis metros de altura– permanece no Patio de Poñente, fronte ao Museo Naval, desde o 4 de xullo de 2002, ano en que foi retirada da praza de España. O traslado, realizado baixo mandato dun goberno dirixido polo BNG, foi xustificado pola construción dun aparcadoiro subterráneo na súa antiga situación, na céntrica praza ferrolá. O emprazamento da estatua converteuse co paso do tempo no patio de acceso a Exponav e ao Museo Militar. Con respecto ao aparcadoiro da praza de España, o alcalde de Ferrol, o socialista Vicente Irisarri, confirmou onte que se inaugurará o 27 de marzo “tras anos de calvario”, indicou. Ese foi o día fixado como data de finalización das obras o pasado mes de febreiro, cando o consistorio admitiu que non se podía cumprir o prazo establecido antes. Irisarri asegurou que este novo prazo vaise cumprir “de forma erscrupulosa”. Na súa opinión, a praza terá “unha calidade magnífica”. Na reforma da superficie da praza –que terá zonas verdes, un parque infantil, novo pavimento e mobiliario– investíronse 1,3 millóns.
Amosa a túa opinión sobre este artigo
|
