21 Xul 2010 |
Oviedo: O Concello buscará un novo lugar para o soldado de Teijeiro
|
Oviedo: O Concello buscará un novo lugar para o soldado de Teijeiro Xa está acabada en Madrid a estatua de Samuel Sánchez que o substituirá  Un taller de Madrid garda xa a figura definitiva do ciclista ovetense Samuel Sánchez retratado no momento en que logrou o ouro nos Xogos Olímpicos de Pequín de 2008. Con ese xesto, dedo cara ao ceo e dentada á medalla, pasará tamén á historia das rúas de Oviedo cando a súa estatua quede a vivir no lugar que até agora ocupa a do soldado, obra de Francisco Asorey, que evoca o recordo do tenente coronel Teijeiro. Aínda que ese soldado con espadón foi un do tres símbolos franquistas que o Concello contemplara retirar, hai xa dous anos, a súa inminente retirada para deixar sitio ao ciclista non suporá necesariamente a súa desaparición das rúas da cidade. Así o confirmaron onte fontes municipais, que precisaron que o Concello está a estudar a posibilidade de buscar unha nova localización ao monumento, que até agora era unha homenaxe ao militar galego que rompeu o cerco a Oviedo o 17 de outubro de 1936. Trataríase, sempre segundo estas fontes, de quitar á estatua de Francisco Asorey toda esa carga ideolóxica que a asocia co franquismo. Illar a inmensa figura do soldado con espada e situalo nun novo lugar permitiría, por unha banda, darlle á cidade unha especie de «monumento ao soldado descoñecido» e, por outra, conservar un elemento xa moi característico da paisaxe urbana. A retirada definitiva, resultado posible ao aplicar a lei da Memoria Histórica, non parece que vaia a aplicarse, como tampouco sucedeu na Xesta ou no medallón de Franco. Amosa a túa opinión sobre este artigo
|
