Comisión pola Recuperación da Memoria Histórica da Coruña

Homenaxe fascista aos mortos por Hitler

Un centenar de franquistas canta a Cara ao sol para honrar aos falecidos da División Azul. A Policía non impediu o acto

A presidenta da Irmandade da División Azul (centro) xunto a membros deste colectivo canta o "Cara ao sol", brazo no alto, onte, no cemiterio.

A Lei da Memoria Histórica volveu onte a ser pisada de forma impune por un grupo de familiares de caídos e fanáticos da División Azul, que acudiron ao cemiterio da Almudena, en Madrid, a homenaxear aos militares que loitaron xunto ás tropas de Adolf Hitler. Tras unha cerimonia relixiosa chegou o momento de entoar o Eu tiña un camarada e despois a Cara ao Sol, saúdo nazi incluído, xunto ao monumento e panteón aos caídos, erixido en 1991.

O acto foi anunciado nunha necrolóxica do xornal ABC pola Fundación Irmandade División Azul, con motivo do 67 aniversario da batalla de Krasny Bor, na Segunda Guerra Mundial, onde morreron miles de españois enviados por Franco en 1941. Entre os asistentes á homenaxe estaban cinco dos soldados que sobreviviron ao asedio de Leningrado.

Os ex combatentes depositaron unha coroa de flores xunto ao monumento funerario que une un crucifixo de ferro e unha bandeira de España franquista. Xunto a eles, un grupo de viúvas, outro de falanxistas e un puñado de mozos con simboloxía neonazi rezaron polo seu recordo.

Tras as oracións relixiosas produciuse a exaltación ilegal do franquismo ao entoar a Cara ao Sol e acompañalo do saúdo nazi. O artigo 15 da lei da memoria, que fala dos "símbolos e monumentos públicos", obriga ás Administracións públicas a "tomar medidas oportunas" para a "retirada" de "mencións conmemorativas de exaltación, persoal ou colectiva, da sublevación militar, da Guerra Civil e da represión da ditadura".

Presenza de antidisturbios

Até cinco furgonetas antidisturbios estaban aparcadas na porta principal do cemiterio municipal antes de que se homenaxease ás tropas enviadas para "liberar a Europa da Rusia opresora", como din os convocantes.

A única misión encomendada aos antidisturbios foi evitar que os franquistas se enfrontasen cos habitantes da casa okupa veciña ao camposanto. Os anticapitalistas colgaron unha enorme pancarta coa lema: "Non máis homenaxes a asasinos fascistas neste cemiterio". A xornada celebrouse sen altercados e tras o clásico "España, unha, grande e libre!", disolveuse a concentración.

A homenaxe aos caídos na División Azul é unha celebración anual que inclúe unha misa na Igrexa dos Jerónimos, en Madrid. Esta parroquia celebrou o pasado 20 de novembro a misa de recordo a Francisco Franco e José Antonio Primo de Rivera. Os asistentes ao cemiterio luciron todo tipo de vestimentas franquistas: camisas azuis, hebillas co xugo e as frechas e insignias co escudo da División Azul. Aínda así, algún se queixou de non lucir a súa vestimenta máis a miúdo: "Estes bandidos quérennolo prohibir todo, que vergoña".

Un dos membros da fundación de familiares leu unha cita bíblica de San Pablo en recordo dos veteranos soldados ausentes. Entre os asistentes había nenos pequenos e mozos que cantaron cada verso da Cara ao sol coma se aínda fose entoado por obrigación no colexio.

Os asistentes resaltaron o valor dos "voluntarios" que acudiron en axuda do eixo Berlín-Roma. O que non mencionaron foi o gran número de fillos de republicanos que acudiron á Segunda Guerra Mundial para poder "limpar" o nome das súas familias mutiladas. É o caso do falecido actor Luís Ciges, fillo do fusilado gobernador civil republicano de Ávila, que estivo na fronte de Polonia. Alí coñeceu ao director de cinema Luís García Berlanga, tamén fillo dun destacado republicano.

O plan do PSOE

A irmandade da División Azul foi fundada en 1954 co obxectivo de repatriar os corpos dos mortos na fronte, que foron enterrados na URSS. Coa desintegración soviética, o PSOE interesouse por estas vítimas e puxo en marcha un plan de localización de enterramentos e exhumación de corpos, que se completou en 1994, coa repatriación nun avión do Exército do primeiro caído.

Este colectivo fai gala na súa web de contar co apoio da Casa Real para as negociacións diplomáticas.O ministro de Defensa, Federico Trillo, entregou en 2002 subvencións para recuperar a memoria destes caídos.

A Federación de Asociacións de Veciños de Madrid enviou o 1 de febreiro unha carta á Delegación de Goberno para que impida un acto similar, polo mesmo motivo, convocado por agrupacións neonazis para o vindeiro sábado.

Amosa a túa opinión sobre este artigo

Nome:
O teu correio:
Encabezamento:
Comment:
Código Antispam:
	Opinar Previsualizar

yvComment v.1.16.1