Comisión pola Recuperación da Memoria Histórica da Coruña

Meirás, pendente de que Carmen Franco "perfile cousas" para abrir

O BNG acusou á Xunta de “conivencia” cos propietarios do pazo para retrasar a súa apertura




Fontes próximas á propietaria do pazo de Meirás, Carmen Franco, confirmaron que, se ben se está a producir un “achegamento” coa Consellería de Cultura  para a apertura do recinto, o Goberno autonómico aínda debe “perfilar cousas” para que iso se produza. O inmoble foi declarado Ben de Interese Cultural (BIC) en decembro de 2008 co anterior Goberno da Xunta, polo que debe abrir ao público catro días ao mes. Desde esa data, a súa dona perdeu todos os recursos xudiciais que presentou contra ese nomeamento. Aínda que o bipartito amosara a súa firme intención de permitir as visitas á antiga residencia de Emilia Pardo Bazán, a chegada do PP a San Caetano freou o proceso.

Hai dous meses, a Consellería de Cultura asegurou que “esgotaría a vía do diálogo” con Carmen Franco antes de abrir o recinto. En vez de facer valer a súa potestade para ordenar a apertura de Meirás ou acudir ás sancións, o departamento autonómico amosou a súa vontade de “manter xuntanzas coa familia para definir un calendario de visitas”. O BNG acusou á Xunta de “conivencia” coa propietaria para “atrasar” a apertura. E é que a Xunta conta con varios autos favorables do Tribunal Superior de Xustiza de Galicia que avalan a súa apertura apelando ao “interese público”. Ademais, xuristas consultados por Xornal confirmaron que, neste sentido, a Xunta podería “forzar xa” a apertura de Meirás. O pazo foi pagado cos fondos públicos dunha dubidosa subscrición popular e entregado ao ditador en plena Guerra Civil.

Actualmente, o caso está pendente dunha resolución do Tribunal Supremo (TS), xa que Carmen Franco recorreu ao Alto Tribunal solicitando “medidas preventivas” polos gastos de seguridade e o “risco de atentados” que suporía a apertura do inmoble aos visitantes. Sen embargo, o TSXG avalou xa que a Xunta debe iniciar de inmediato as visitas públicas ao lugar.

"Inminente apertura"

Foron varias as datas fixadas pola Xunta para a apertura dunha das iconas do franquismo, residencia de verán do caudillo durante case catro décadas. En setembro do ano pasado, o conselleiro de Cultura, Roberto Varela, asegurou que apertura do recinto produciríase “en menos dun mes”. E, en febreiro deste mesmo ano, o director xeral de Patrimonio, Jose Manuel Rey Pichel, manifestou a necesidade dunha “inminente apertura”. Nesa ocasión, Pichel cualificou a actitude de Carmen Franco como “prudencia lexítima” e asegurou que as conversas nas que o seu departamento leva meses enfrascado estaban sendo “positivas”. Ademais, asegurou que “non hai oposición por parte de Carmen Franco, senón “prudencia lexítima”.