“Liberdade" para Monte Alto Queren roubarnos a rúa “Liberdade”
 A Asociación de Veciños de Atochas-Monte Alto-Torre de Hércules e a Comisión pola Recuperación da Memoria Histórica da Coruña inician unha campaña para reivindicar a rúa “Liberdade” para Monte Alto.
A rúa “Liberdade” está ligada desde hai máis de cen anos á historia do barrio de Monte Alto. Pouco despois de producirse o levantamento militar fascista contra o goberno constitucional e lexítimo da República, a corporación municipal, que presidía o capitán Fuciños como alcalde, tomaba o 18 de setembro de 1936 o acordo de cambiar o nome de numerosas rúas, entre elas a rúa “Liberdade”, que é substituída por “Disciplina”.
Fixeron este cambio porque o nome que tiña “pugna abiertamente con el actual movimiento glorioso salvador de España”, según figura na acta da sesión. O réxime franquista deixaba claro desde o primeiro momento que non quería nada de liberdade e que na ditadura só había sitio para a man dura e a represión.
A Lei da Memoria Histórica abre a posibilidade de eliminar a simboloxía franquista, como a rúa “Disciplina”, e de recuperar o nome tradicional de “Liberdade”, pero o Goberno municipal toma a lamentable decisión de levar a rúa Liberdade ao barrio de Vioño, onde non vive aínda ninguén.
Estamos, xa que logo, ante un auténtico roubo, que non podemos permitir. Por iso a Asociación de Veciños e a CRMH iniciarán unha campaña informativa, recollerán firmas e realizarán diversas actividades para que o concello rectifique e devolva a rúa “Liberdade” onde sempre estivo, é dicir, no barrio de Monte Alto.
A Coruña, 4 de agosto de 2009
Recibide un cordial saúdo.
Asdo.
Asociación de Veciños de Atochas-Monte Alto-Torre de Hércules
Comisión pola Recuperación da Memoria Histórica da Coruña
Arquivos adxuntos| Arquivo | Descrición | Tamaño |
|---|
 Cartaz_A3_LiberdadeMonteAlto.pdf | Cartaz da campaña Liberdade para Monte Alto promovida pola Asociación de veciños e maila CRMH | 1301 Kb |
|
