A CRMH da Coruña celebrará a apertura do Pazo de Meirás En tempos de crise, e para abaratar custes de mantemento, a familia Franco debe abandonar xa o Pazo de Meirás. 
A CRMH da Coruña celebrará a apertura do pazo organizando excursións gratuitas en autobús e visitas guiadas, entregará un folleto informativo aos visitantes, que levará por título: O roubo do Pazo de Meirás.
Perante a resolución do Tribunal Superior de Xustiza de Galicia desestimando a petición da Familia do ditador Francisco Franco para suspender a declaración do pazo de Meirás como Ben de Interese Cultural, a Comisión pola Recuperación da Memoria Histórica da Coruña manifesta a súa satisfacción e espera que a Consellería de Cultura da Xunta de Galicia proceda, de inmediato, a sinalar os días de visita obrigatoria.
Se a familia Franco continúa coa súa estratexia de impedir o acceso do público, a Xunta de Galicia debería tomar cartas no asunto e aplicar as sancións correspondentes, previstas na Lei
Ante as alegacións da familia no recurso desestimado –dicían que a apertura ao público aumentaría os gastos de vixilancia e seguro de accidentes- a CRMH aconsella á familia do Ditador que en tempos de crise hai que reducir os custes de mantemento das propiedades; e que, neste caso, o mellor é que marchen e devolvan o pazo de Meirás ao patrimonio público.
Cando coñezamos os días de apertura, a CRMH organizará excursións gratuítas en autobús a Meirás para que as persoas interesadas poden coñecer o interior do pazo de Meirás. Para que a familia Franco non teña ningún gasto, poñeremos nós os guías profesionais, que expliquen a historia do pazo. E para facilitar a información entregaremos ás visitas un folleto informativo, que se titulará: O roubo do pazo de Meirás, lembrando cómo o pazo foi doado, daquela, ao xefe do Estado, despois do cobro dun “imposto revolucionario” –como fai hoxe a organización terrorista ETA- que se descontaba aos traballadores da súa nómina, utilizando todo tipo de chantaxes e coaccións.
Como sempre, a Comisión pola Recuperación da Memoria Histórica da Coruña realizará estas actividades de forma festiva e pacífica, sen alterar a orde pública e sen danar o pazo de Meirás porque somos os primeiros interesados na súa boa conservación para cando consigamos a súa devolución ao patrimonio público.
|
