Declaración do Pazo de Meirás como BIC Unha victoria parcial 
GAÑAR A BATALLA DA RECUPERACIÓN DO PAZO PARA O PATRIMONIO PUBLICO É UNHA CUESTIÓN DE DIGNIDADE 1. Para a Comisión pola Recuperación da Memoria Histórica (CRMH) da Coruña a aprobación pola Xunta do Pazo de Meirás como Ben de Interese Cultural (BIC) é unha boa noticia pola que estamos a traballar desde hai anos. É unha vitoria parcial, mais queda por gañar a batalla máis importante, é dicir, conseguir a devolución do pazo de Meirás ao patrimonio público. Despois de 70 anos de ocupación, botar fóra do pazo á familia do Ditador, é unha cuestión de xustiza e dignidade.
2. A CRMH continuará promovendo todo tipo de actividades para conseguir este obxectivo e vencer a resistencia da familia Franco, empeñada en manterse como propietarios dun pazo, que foi adquirido con todo tipo de presións e ameazas a traballadores e funcionarios, descontándolles unha parte do seu salario.
3. A CRMH organizará -cando se abra ao público, catro días ao mes- visitas guiadas con autobuses gratuítos desde A Coruña, realizando unha ocupación simbólica do pazo de Meirás. Todas as persoas recibirán un folleto informativo, titulado O ROBO DO PAZO DE MEIRÁS, con detalles sobre a historia do pazo e os métodos empregados para a súa adquisición.
4. A CRMH xa solicitou ao Xuíz Garzón o pasado 20 de novembro que “traslade á Fiscalía Xeral do Estado e ás Cortes Xerais a nosa petición de que se tomen as medidas precisas para a realización dun inventario dos bens que están en poder das familias dos responsables do Golpe de Estado de 1936 e que foron adquiridos no exercicio do poder; e que se elabore a lexislación necesaria para que esas propiedades pasen ao patrimonio público”.
5. A CRMH solicitará aos concellos da área metropolitana da Coruña un pronunciamento do Pleno da corporación para que o pazo de Meirás sexa recuperado para o patrimonio público.
6. O mesmo que en 1938 significados persoeiros e dirixentes fascistas promoveron unha “Junta Provincial Pro Pazo del Caudillo”, a CRMH promoverá a creación dunha Xunta Nacional para a Recuperación do Pazo de Meirás.
Moitas grazas pola atención que nos dispensades e ¡Feliz ano novo!
A Coruña, 30 de decembro de 2008.
Rubén Afonso Lobato, responsable de Comunicación.
|
