PORQUE SOMOS UN POBO EMIGRANTE,
NÓS SÍ QUEREMOS AOS INMIGRANTE

Prezadas/os amigas/os:

   A través das actividades que desenvolvemos desde a Comisión pola Recuperación da Memoria Histórica da Coruña, podemos comprobar que somos un pobo emigrante; centos de miles de galegas e galegos desprazáronse durante anos fóra do seu país buscando unha vida mellor.

   Hoxe Galicia é un país receptor de inmigrantes, máis de 80.000, e, ademais, 100.000 naceron no estranxeiro e aparecen como españois no seu documento de identidade; as persoas inmigrantes aportan xa o 13,39% do crecemento da economía galega. Por outra parte, estamos a comprobar que, ás veces,  non son tan ben recibidos e tratados como a nós nos gustaba cando chegábamos a outros países como emigrantes.

   Hai que frear os brotes de xenofobia e racismo para que non prendan na sociedade. Vemos tamén que, desde certas opcións políticas, se crea alarma social e se utilizan aos inmigrantes como arma de confrontación política co único obxectivo de obter beneficios electorais. Algúns titulares aparecidos nos medios de comunicación son realmente preocupantes: “Apalean a un colombiano en Madrid al grito de viva España”. Convócanse manifestacións baixo o lema:”La inmigración destruye tu futuro”. Algúns políticos declaran que “coa chegada de inmigrantes xa non cabemos” ou chegan a responsabilizar aos inmigrantes do colapso das urxencias hospitalarias...

   Consideramos que o conxunto da sociedade civil debe mobilizarse e levar adiante unha política preventiva, contra estes brotes, e de educación integradora. Que os inmigrantes perciban que son ben recibidos e tratados con cariño, que teñen os mesmos dereitos e deberes que nós; que as novas xeracións acepten a multiculturalidade como unha cousa positiva, como unha riqueza, e cultiven aquela frase do Che: “A solidariedade é a tenrura dos pobos”.

   Desde a Comisión pola Recuperación da Memoria Histórica da Coruña consideramos que, respectando a independencia e o traballo que fai cada asociación, é posíbel desenvolver conxunta e coordinadamente unha serie de actuacións.

   Por todos estes motivos, convocamos unha reunión, en réxime de autoconvocatoria, para o xoves, 15 de maio, ás 7 da tarde, na Casa Museo Casares Quiroga (rúa Panadeiras, 12), co obxecto de cambiar impresións e ver que podemos facer conxuntamente. Podedes confirmar a vosa asistencia en:  Este enderezo de correo-e está a ser protexido de robots spamers, precisas activar o JavaScript para velo   ou nos teléfonos 981924427 e 645029338.

Recibide unha aperta.
A Coruña,  12 de maio de 2008