08 Mai 2008 |
A CRMH PIDE AOS SINDICATOS QUE SOLICITEN Á CONSELLERÍA DE SANIDADE O CAMBIO DE NOME DO HOSPITAL JUAN CANALEJO
|
| Estimadas/os amigas/os: O 26 de decembro de 2006 o Parlamento Galego aprobaba unha Proposición non de Lei na que instaba ao Goberno a retirar progresivamente dos edificios públicos e centros dependentes da administración as denominacións que fagan referencia a figuras ou feitos relacionados co franquismo. O pasado 26 de marzo de 2008 o Parlamento Galego aprobaba outra Proposición non de Lei na que instaba á Xunta de Galicia a “eliminar de todos os edificios públicos dependentes da súa administración toda a simboloxía fascista e a promover a supresión dos nomes destes edificios que fan referencia a persoeiros representantes ou partidarios da ditadura franquista”. Evidentemente, Juan Canalejo é un deses persoeiros. Desde a Comisión pola Recuperación da Memoria Histórica da Coruña dirixímonos xa á conselleira de Sanidade da Xunta de Galicia –acompañamos a carta- para que se proceda ao cambio de nome. Lembramos que o Hospital Juan Canalejo é o único en España que leva o nome dun fascista; isto é unha vergoña para A Coruña. Xa desapareceron noutros hospitais os nomes de persoas relacionadas coa Ditadura; así, as cidades sanitarias Francisco Franco de Madrid e Barcelona, chámanse hoxe, respectivamente, Gregorio Marañón e Vall D´hebrón. Tamén cambiaron o seu nome os hospitais galegos: “Hermanos Pedrosa” (dous coñecidos fascistas) chámase hoxe Complexo Hospitalario Xeral-Calde de Lugo; e o “Almirante Vierna” chámase hoxe Complexo Hospitalario Universitario de Vigo. Ninguén pode dicir que o Gregorio Marañón non é hoxe unha referencia ou que ten menos recoñecemento científico-médico que cando se chamaba Francisco Franco. Desde a CRMH da Coruña consideramos que o cambio de nome do hospital é unha cuestión de recuperación da dignidade, de xustiza e de consolidación da democracia; cuestións todas elas que afectan ao conxunto do persoal do hospital e a toda a cidadanía. Todos eses cambios de nomes noutros hospitais de España e Galicia, como non podía ser doutro xeito, contaron cun apoio expreso dos sindicatos. Pedimos que o voso sindicato solicite á consellería de Sanidade da Xunta de Galicia o cambio do nome do hospital Juan Canalejo -en cumprimento da recentemente aprobada lei da Memoria Histórica e das resolucións do Parlamento Galego- e que se aprobe esta petición na Xunta de Persoal do Juan Canalejo. Quedamos a vosa disposición por se queredes organizar algún acto informativo para o persoal do hospital sobre a figura de Juan Canalejo. Xa sabedes que colaboran coa nosa asociación un numeroso grupos de historiadores. Acompañamos algúns textos de escritores e historiadores sobre quen era Juan Canalejo. Unha aperta. A Coruña, 7 de maio de 2008 Asdo.: Manuel Monge, Presidente da CRMH da Coruña |
