Comisión pola Recuperación da Memoria Histórica da Coruña

Discurso de homenaxe aos labregos represaliados do Porriño

Por Ángel Rodríguez Gallardo, presidente da Asociación Memoria Histórica do 36 de Ponteareas

Gustariamos de compartir convosco a importancia histórica, moral, emocional e xurídica deste sinxelo acto.

Foron impunemente asasinados hai setenta e tres anos e enterrados aquí no adro da igrexa de Areas, ás agachadas, no silencio escuro da noite. A súa historia era un relato sen final, sen duelo. Un relato cheo da desmemoria e da dor de sete décadas.

Sabiamos que eran labregos, cinco labregos: Saturnino Vila Quiroga, Serafín Rodríguez Alonso, Manuel Pérez Vila, José Ramírez Vila e José Rodríguez Carrera.

Sabiamos que eran labregos que facían parte desa República de traballadores e traballadoras que crían unha sociedade aberta, libre e xusta.

Sabemos por fin que ese relato ten un final. Sabemos que estes cinco labregos volven a casa, ao Porriño.

Agora que chega o día da última viaxe, agora que están a piques de marchar de Areas, entregamos a Saturnino Vila Quiroga, Serafín Rodríguez Alonso, Manuel Pérez Vila, José Ramírez Vila e José Rodríguez Carrera, aos seus familiares.

Lixeiros de equipaxe, case nus, como os fillos da nosa terra, parten finalmente para O Porriño. Que a terra galega, agora si, lles sexa leve.